Սուրբծննդյան հիշարժան ակցիաները

Սուրբծննդյան և ամանորյա տոներին ընդառաջ՝ վերհիշում ենք գովազդային շուկայի մի քանի գիգանտների լավագույն արշավները։ Տոներն են մոտենում
Ամեն տարի ականատես ենք լինում գովազդային արշավների հրավառության, երբ շատ հաճախ բրենդները, մի կողմ թողնելով սպառողներին ապրանք վաճառելու «մոլուցքը», ստեղծում են հոլովակներ, որոնցով սեր ու ջերմություն են տարածում մարդկանց միջև՝ շատ հաճախ հենց դրանով ստանալով ճանաչում և գրավելով նոր սեգմենտներ։
Խորհուրդ ենք տալիս բոլոր բիզնեսներին տեխնիկապես պատրաստվել հաճախորդների հոսքի աճին, սոցհարթակներում և կայքերում ստեղծել FAQ բաժիններ, ինչպես նաև օգտագործել առիթը սպառողներին նվերներ անելու և բրենդի լոյալության վրա աշխատելու։
Մինչև մի քանի դիտարժան արշավներին անցնելը խոսենք վիճակագրության մասին․ հետազոտությունները ցույց են տվել, որ սուրբծննդյան տոներին ընդառաջ՝ սպառողների մոտ կտրուկ աճում է գնումներ կատարելու պարբերականությունը, հատկապես՝ օնլայն՝ պայմանավորված վերջին տարիներին ամբողջ աշխարհում տարածված պանդեմիայով․ սոցցանցերի միջոցով կատարվող գնումները ամսական կտրվածքով մոտ 18%-ով ավել են սովորականից։

Դե ինչ, ներկայացնենք գովազդային մի քանի հոլովակ, որոնք, անշուշտ, ամանորյա տրամադրություն կարթնացնեն․

WestJet։ Christmas Miracle
Կանադական WestJet ավիաընկերության սուրբծննդյան արշավն ամենահիշարժաններից է։ Սուրբ ծնունդից առաջ իրականացվող թռիչքներից մեկից առաջ Սանտան օդանավակայանում բոլոր ուղևորներից հարցնում էր, թե ինչ նվերներ են ուզում ստանալ, իսկ ընկերության աշխատակիցները թռիչքի մյուս ծայրում ցուցակ էին կազմում և փաթեթավորում նվերները՝ գուլպայից մինչև մեծ հեռուստացույց։ Դե իսկ նվերների հանձնումը կազմակերպվեց ուղեբեռների ուղեգորգի վրա՝ պարգևելով բոլորին ամանորյա հրաշքի անմոռանալի զգացողությունը։

Այս արշավն ընդգծեց ընկերության անսահման նրբանկատ վերաբերմունքն իր սպառողների հանդեպ, իսկ վիդեոն ունեցավ ավելի քան 48 մլն դիտում՝ ակտուալ մնալով մինչ այսօր։
Apple: Make Someone's Holiday
Գովազդը սկսվում է մի ընտանիքի պատմությամբ, ով սուրբծննդյան տոներին ճամփորդում է՝ ողջ ընթացքում տարբեր իրավիճակներում օգտագործելով Ipad-ը։
Apple-ի գովազդները հիմնականում ուղղված են պրոդուկտի որևէ ֆունկցիայի կարևորության ու նորարարության ընդգծմանը, սակայն սուրբծննդյան այս հոլովակում Ipad-ը պարզապես օգնում է պատմել ընտանիքի հուզիչ պատմությունը և ստեղծում սուրբծննդյան բարի տրամադրություն։
Coca-Cola Canada: Give Something Only You Can Give
Բոլորս կփաստենք, որ Կոկա Կոլայի ամանորյա արշավներն ամենահիշարժանն ու սիմվոլիկն են (եթե չգիտեիք, Ձմեռ պապիկի հագուստի կարմիր-սպիտակ համադրությունը հենց Կոկա Կոլայի գովազդային արշավների արդյունքն է)։
Այս հոլովակը ցույց է տալիս, թե ինչպես է հայրիկը Սուրբ Ծննդի նախօրեին ամեն կերպ փորձում իր դստեր նամակը հասցնել Սանտային՝ վտանգելով սեփական կյանքն ու չհանձնվելով ոչ մի դժվարությունից։

Վերջապես հասնելով Սանտայի տուն՝ հայրը տեսնում է, որ այն փակ է՝ տոներով պայմանավորված։ Ի վերջո հենց Սանտան իր հայտնի բեռնատարով հայրիկին հասցնում է տուն՝ փոխանցելով դստեր նամակը, որում վերջինս Սանտայից խնդրում էր, որ սուրբծննդյան տոներին իր հայրիկին տուն բերի։

Թեև մենք միշտ տարված ենք` հիշարժան ու թանկարժեք նվերներ փնտրելով, երբեմն այն ամենը, ինչ պետք է մեր հարազատներին, մեր սերն ու ժամանակն է։
Erste Group Bank: #EdgarsChristmas #believeinlove #believeinchristmas
Թեև Erste Group Bank-ը` որպես բրենդ, այնքան էլ հայտնի չէ, բայց նրա նախորդ հոլովակը՝ նվիրված Սուրբ ծնունդին, հաստատ տեսել եք։
Այս անգամ ևս բրենդը չի իջեցրել իր սահմանած նշաձողը և ստեղծել ևս մեկ դիտարժան հոլովակ, որտեղ ավելի պարզ է դառնում ընկերության առաքելությունը։
Գովազդը պատմում է այն մասին, թե ինչպես է թոռնուհին դաշնամուր գնում իր պապիկի համար՝ նվիրելով նրան իր մայրիկի հետ նվագելու մանկական էմոցիաներն ու հույզերը։
Coca Cola։ White Christmas
“White Christmas” արշավի շրջանակներում Կոկա Կոլան, հավատարիմ մնալով իր «Կիսի՛ր երջանկությունդ» կարգախոսին, սուրբծննդյան խորհրդանիշ ճերմակ ձյունը աշխարհի տարբեր անկյուններից «հասցնում է» Սինգապուր, որտեղ բնակլիմայական պայմանների պատճառով այդ հրաշքը երբեք հասանելի չի եղել բնակիչներին։
KLM serves a Bonding Christmas Buffet
Թեև Ամստերդամի Schiphol օդանավակայանը Սուրբ ծնունդին բավականին մարդաշատ է, այնուամենայնիվ նույնիսկ այդ տոնական օրը շատ ու շատ մարդիկ իրենց օդանավին սպասում են միայնակ՝ գիրք կարդալով, երաժշտություն լսելով կամ սմարթֆոնով զբաղվելով։
KLM Royal Dutch Airlines-ը սուրբծննդյան արշավի շրջանակներում անակնկալ ընթրիք էր պատրաստել սպասասրահի բոլոր ուղևորների համար, ովքեր ի վերջո համախմբվեցին և միասին նշեցին ամենագեղեցիկ տոներից մեկը․
Դե իսկ վերջում ամփոփելով կարող ենք ասել՝ կարևոր չէ՝ ինչ բիզնես եք վարում, կամ տարվա որ եղանակն է․ երբեմն անհրաժեշտ է պարզապես ստեղծել էմոցիաներ ու փոխանցել դրանք։
Ուրախ տոներ ենք մաղթում։
Made on
Tilda