Ամեն տարի` մարտի 8-ին, բրենդները բաց չեն թողնում առիթը ևս մեկ անգամ ուշադրությունը հրավիրելու կանանց իրավունքներին պաշտպանմանը՝ ստեղծելով դրա կարևորությունն ընդգծող գովազդային արշավներ, որոնցից լավագույններին անդրադարձել ենք այս հոդվածում:

2019թ.-ին Կանանց միջազգային օրվան ընդառաջ՝ Calvin Klein-ը սկսեց գովազդային արշավ, որն առավելապես ուղղորդված էր ասիական շուկային և կենտրոնացած գենդերային ավանդական նորմերի բարելավման ու զարգացման վրա:

Արշավի կենտրոնում ասիացի այն կանայք են, ովքեր համարձակ կերպով ներկայացնում են իրենց գենդերային ինքնության հանդիպած խոչընդոտները՝ մենախոսության տեսքով ընդգծելով անձի ինքնաբացահայտման կարևորությունը՝ ի հակադրումն հասարակության ճնշման և ստեղծած խոչընդոտների:

Netflix-ի նախաձեռնած արշավում դերասանուհի Uzo Aduba-ն, նստած տեսախցիկի առաջ, խոսում է այն մասին, թե ինչպես են ստեղծվում կանանց և անապահով այլ հարթակների մասին պատմություններ, որոնք ոչ միշտ են իրենց տեղը գտնում Հոլիվուդում և առերեսվում են մի շարք խոչընդոտների։

Ինչպես նշվում է հոլովակում՝ More room. More stories. More voices.


Isobar-ը Digital Agency է, ով զբաղվում է Reebok India-ի թվային մարքեթինգով: Կանանց միջազգային օրը գործակալությունը մի պրովոկացիոն ակցիա էր կազմակերպել՝ #BruisesCanBeGood, որն ուղեկցվում էր սոցիալական էքսպերիմենտով:

Հետազոտությունների համաձայն՝ Հնդկաստանում 15 տարեկանից սկսած ամեն 3-րդ կին ընտանեկան բռնության է ենթարկվում: #BruisesCanBeGood արշավը մեկ անգամ ևս հաստատեց ինքնապաշտպանական կրթության անհրաժեշտությունը:

Էքսպերիմենտի էությունը հետևյալն է. լսարանի առջև նստած է կապտուկներով երիտասարդ աղջիկ, ով բոլոր ներկաների մոտ խղճահարություն և կարեկցանք է առաջացնում: Բոլորը նրան ընտանեկան բռնության զոհ են համարում, մինչև որ վերջինս ցույց է տալիս՝ իրականում ով է:

Ուստի ինչպես արշավն է փաստում, կապտուկները կարող են գեղեցիկ լինել. դրանք ուժի, այլ ոչ թե թուլության ապացույցն են։ Յուրաքանչյուր կին կարող է և պետք է լինի ուժեղ, ինքնավստահ և պաշտպանի իրեն ու իր իրավունքները:

Հաջորդ արշավը, որն արժանի է ձեր ուշադրությանը, իրականացվել է Women’s Aid-ի կողմից և ներգրավել ավելի քան 326 միլիոն մարդու:

Արշավն իրականացվել է արտաքին գովազդային պաստառների և տեսախցիկների կիրառմամբ: Հասարակական վայրերում տեղադրված պաստառների վրա պատկերված էին կապտուկներով կանայք, և գրված էր «Նայի՛ր ինձ»: Պաստառներն ինտերակտիվ էին. երբ անցորդներն արհամարում էին դրանք, ոչ մի փոփոխություն տեղի չէր ունենում, իսկ երբ կանգ էին առնում և նայում պատկերված կանանց, վերջիններիս դեմքերի կապտուկներն ու վնասվածքներն աստիճանաբար անցնում էին՝ ստանալով միանգամայն առողջ տեսք:

Արշավի մեսիջը պարզ է. աչք չփակել ընտանեկան բռնության վրա. եթե կարող ես տեսնել, կարող ես նաև փոխել իրավիճակը և կյանքը դարձնել ավելի գեղեցիկ:

Ուշագրավ է նաև Barbie-ի 2018թ.-ի արշավը, որը հիմնված է հստակ հետազոտության վրա. 5 տարեկանից սկսած՝ շատ աղջիկներ սկսում են իրենց մեջ ձևավորել կաղապարված մի համոզմունք այն մասին, որ իրենք այնքան խելացի և ընդունակ չեն, որքան տղաները: The Dream Gap Project-ի շրջանակներում ընկերությունը փորձում է կոտրել այդ կարծրատիպը և վստահեցնել, որ յուրաքանչյուր ոք կարող է դառնալ իր երազած անհատականությունը՝ անկախ սեռից:

Դե իսկ ամփոփելով ցանկանում ենք շնորհակալություն հայտնել բոլոր կանանց, ովքեր իրենց գործունեությամբ և գոյությամբ դարձնում են աշխարհն ավելի գեղեցիկ: